اسلام آباد:

وزیر اعظم شہباز شریف نے جمعرات کو نیول ہیڈ کوارٹرز کا دورہ کیا جہاں انہوں نے محدود وسائل کے باوجود ملک کے بحری مفادات کے تحفظ کے لیے پاک بحریہ کی خدمات کو سراہا۔
وفاقی وزراء کے ہمراہ وزیراعظم نے تربت میں نیول ایئربیس پر حالیہ دہشت گردانہ حملے کو ناکام بنانے کے لیے پاک بحریہ کے پیشہ وارانہ ردعمل کی خاص طور پر تعریف کی۔

آمد پر پاک بحریہ کے سربراہ ایڈمرل نوید اشرف نے وزیراعظم کا استقبال کیا اور پاک بحریہ کے چاق وچوبند دستے نے انہیں گارڈ آف آنر پیش کیا۔

وزیراعظم نے یادگار شہدا پر پھولوں کی چادر چڑھائی اور بعد ازاں نیول ہیڈ کوارٹرز کے پرنسپل اسٹاف آفیسرز سے ان کا تعارف کرایا گیا۔

ملاقات کے دوران علاقائی میری ٹائم سیکیورٹی صورتحال اور پاک بحریہ کی آپریشنل تیاریوں سے متعلق امور پر تبادلہ خیال کیا گیا۔

نیول چیف نے وزیراعظم کو پاک بحریہ کے کردار، صلاحیتوں اور مستقبل کی جدید کاری کے منصوبوں سے آگاہ کیا۔

بعد ازاں ڈپٹی چیف آف نیول اسٹاف (آپریشنز) کی جانب سے موجودہ میری ٹائم ماحولیات، پاک بحریہ کو درپیش چیلنجز اور چیلنجز سے نمٹنے کے لیے اس کے ردعمل کے بارے میں تفصیلی بریفنگ دی گئی۔

وزیراعظم کو خاص طور پر میری ٹائم ڈومین میں ملک کو درپیش موجودہ اور مستقبل کے چیلنجز سے نمٹنے کے لیے پاک بحریہ کی صلاحیت کی ضروریات کے بارے میں آگاہ کیا گیا۔

انہیں میری ٹائم سیکٹر کے معاشی امکانات سے فائدہ اٹھانے کے اقدامات سے بھی آگاہ کیا گیا۔
وزیر اعظم شہباز نے زور دیا کہ مضبوط معیشت ملک کو درپیش تمام چیلنجز سے نمٹنے کی کلید رکھتی ہے۔ آخر میں وزیراعظم نے پاک بحریہ کے کمانڈ آپریشن سینٹر کا دورہ بھی کیا۔

نیول چیف نے وزیراعظم کے دورے اور بحریہ پر اعتماد کا اظہار کرنے پر شکریہ ادا کیا۔
انہوں نے یہ بھی یقین دلایا کہ پاک بحریہ اللہ کی مدد سے ملک کی سمندری سرحدوں اور بحری مفادات کا دفاع جاری رکھے گی اور امن اور جنگ دونوں میں ذمہ داریوں کو عزت کے ساتھ نبھائے گی۔